Lehenengo partidan Sasiain-Gorostola eta Martija-Odriozola bikoteak neurtu ziren. Lehen zatian partida nahiko berdinduta joan zen (3-0, 3-3, 7-4, 8-5), bai jokoan, baita markagailuan ere. Hortik aurrera nagusitu egin ziren atzo gerriko gorria zeramaten Sasiain eta Gorostola (11-6, 15-7, 16-9, 17-11 eta 22-11).
Bigarren partidan Oliden eta Alkorta (Antiaren ordez jokatu zuena), Etxabe eta Unanueren aurka aritu ziren. 2-0, 2-2, 7-3, 11-4, 12-5, 14-7, 18-10 eta 22-10 nahiko errez nagusitu ziren faborito bezala ateratako oikiar Oliden eta Alkorta.
Txapelketako azken partidak, berez, bihar ziren jokatzekoak, baina eguraldi txarra dago iragarrita asteazkenerako eta data ostiralera arte atzeratzeko erabakia hartu dute. Hala, 3. eta 4. postuak eta finala erabakiko dituen partidak ostiralean jokatuko dira, 18:30etik aurrera, Larretxoko frontoian.
Partidak hauek izango dira:
3. eta 4. postuetarako: MARTIJA-ODRIOZOLA / ETXABE-UNANUE.
Finala: OLIDEN-ALKORTA / SASIAIN-GOROSTOLA