Verducidon (Pontevedra, Galizia) jokatu dira asteburu honetan txapelketarako sailkatze probak. Iñigo Peñak eta Francisco Cubelosek larunbatean izan zuten estropada, 1.000 metroan. Distantzia honetako munduko azpitxapeldunek 3:11,418 denbora eginda lortu dute Munduko txapelketarako saikapena, estropadan Albert Martí eta Roi Rodriguezi irabazi ondoren.
Peña pozik zen sailkatzeagatik, eta baita denboraldia hasi delako. "Behingoz hasi da denboraldia. Hainbeste hilabeteko geldialdiaren ondoren lehiatzeko gogoz ginen. Estropada gogorra izan da, baina ona, eta Espainiako K2 onena izatea lortu dugu berriro ere. Orain Munduko Koparako prestatu behar dugu hiru hilabete hauetan, Szegeden berriro lan ona egiteko".