Aurkari gogorra zuten irundarrek txapelketa honetako lehen faseko partidan: PAUC Handball talde frantziarra, hain zuze ere. Denboraldiko lehen partida ofiziala zuen Bidasoak, eta 600 lagun hurreratu ziren Artaleku kiroldegira partida jarraitzera. Hasi eta berehala aurretik jarri ziren etxekoak (3-0, 6-2). Talde frantziarra, ordea, ez zegoen partida erregalatzeko asmoekin, eta markagailuan hurreratu (7-6) ziren, eta baita berdindu ere (9-9). Lehen zatia Bidasoaren aldeko emaitzarekin bukatu zen (14-13).
Bigarren zatia lehenengoaren antzera hasi zen, eta aldea zabaldu zuen Bidasoak markagailuan (22-17), baina baita PAUCek berdindu ere (23-23). Hutsartea eskatu zuen Jacobo Cuetara irundarren entrenatzaileak, eta ongi etorri zitzaion bidatzen duen taldeari. Atseden horren ondoren, Kauldi Odriozolaren –zortzi gol sartu zituen, eta bera izan zen Bidasoaren goleatzaile nagusia– eta Rodrigo Salinasen (6 gol guztira) golei esker, garaipena eta bigarren faserako txartela lortu zuen Irungo taldeak.
Gaur egin dute bigarren faseko norgehiagokak erabakitzeko zozketa, Vienan (Austria). Bidasoari RK Nexe talde kroaziarra egokitu zaio. Joaneko partida Artalekun jokatuko da irailaren 22an, eta itzulerakoa Kroazian, astebete beranduago, irailaren 29an.