Larria da Moriako errefuxiatuen kanpalekuetan dauden pertsonen egoera. Haien bizi baldintzak nolabait lagundu nahian, janari bilketa jarri du abian Zaporeak elkarteak, herri bakoitzeko eragileen laguntzarekin. Ostiralean eta larunbatean egin dute bilketa Zumaian, Errefuxiatuen Harrera Taldeko eta Darahli Elkarteko kideen laguntzarekin.
Zumaiako Herri Eskolako frontoian eta Ardantzabideko aterpean egin dute bilketa. Inguruko denda eta supermerkatuetan ere utz zitezkeen gaiak, eta erosketa orgen bidez eramaten zituzten aipatutako bi lekuetara.
Deialdiak erantzun "oso ona" izan duela azaldu dute antolatzaileek. Eguraldi txarrari aurre egin, eta herritarrek bikain erantzun dute beste behin ere. Guztira 2,4 tona inguru elikagai jaso dituzte bi egunetan.