Itsas ondarearen jaialdia egin zen atzo Zumaian, Euskal Kostaldeko Geoparkea sortu zutela hamar urte betetzen direla ospatzeko. Urteurren horren harira Geoparkea osatzen duten hiru herritan egingo da jaialdi hau. Datozen bi asteburutan Mutrikun eta Deban egingo dira programako ekitaldiak: datorren larunbatean, hilaren 10ean, Mutrikun; eta urriaren 17an Deban.
Hiru anai batelaren, arotzen erreminten, eta itsasoarekin lotutako tresnen erakusketa egin zen Kofradiako plazatxoan. Kofradiako arrain salmenta gela ikusi eta ezagutzeko aukera ere izan zen. Arratsaldean, ordea, errioan ontzi tradizionaletan nabigatzeko aukera eman zitzaien herritarrei. Beduolako kideek beraien ontziak atera zituzten, eta ibaian gora eta behera ibiltzeko aukera izan zuten bertaratu eta izena eman zutenek.
Argazkiak: Sara Utrera.
