Eusko Jaurlaritzako Osasun Sailak jakinarazi duenez, 11.088 proba –PCR probak eta antigeno probak– egin zituzten atzo Araban, Bizkaian eta Gipuzkoan. Horietatik 1.012 izan ziren emaitza positiboak. Herenegun, 12.895 proba eginda (1.807 gehiago), 1.212 positibo atzeman zituzten (200 gehiago).
Beste behin ere, Gipuzkoan atzeman zituzten kasu berri gehien atzo: 459. Herenegun, 620 izan ziren positibo berriak lurralde horretan. Une honetan, Gipuzkoako datuetatik hurbilago dago Bizkaia, atzetik jarraitzen baitio alde txikiarekin: atzoko probetan 443 pertsonak eman zuten positibo. Araba, aldiz, 100eko langatik jaitsi da: 99 positibo zenbatu zituzten atzo lurralde horretan. Osasun Sailak zenbatu dituen gainontzeko 11 positiboak beste erkidego batzuetako biztanleak dira.
Erietxeei dagokienez, atzokoan 36 pertsona ospitaleratu zituzten, herenegun baino 25 gutxiago. Egun, Zainketa Intentsiboetako Unitatean daude COVID-19ak jotako 74 pertsona.
Osasun Sailak bihar argitaratuko ditu udalerriei dagozkien datu zehatzak, baita intzidentzia tasak ere.
Nafarroan, bestalde, koronabirusa atzemateko 3.332 proba egin zituzten atzo. 706 positibo zenbatu zituzten (%21,2).