Eusko Jaurlaritzako Osasun Sailak argitara atera ditu asteburuko PCR eta antigenoen emaitzak, eta aurreko asteburuan baino positibo gutxiago atzeman dituzte oraingoan Zumaian. Hain zuzen ere, zazpi kasu positibo atzeman dituzte asteburuan Zumaian: bi ostiralean, hiru larunbatean eta beste bi atzo. Aurreko asteburuan hamabi izan ziren kasuak. Azpimarratzekoa da Zumaian positiboen kopuruak izan duen beherakada. Azaroaren 2tik 8ra 37 kasu zenbatu zituzten eta 1343,51koa zen intzidentzia tasa, eta pasa den astean (azaroaren 9tik 15era), ordea, 24 positibo izan dira. Azkeneko datuekin, 620,87koa da kasu metatuen tasa.
Urola Kostan ere behera egin dute positiboek. Ostiraletik igandera bitartean 95 lagunek eman dute positibo eskualdean: 37 izan ziren ostiralean, 28 larunbatean eta 30 atzo, igandea. Aurreko asteburuan (azaroaren 6tik 8ra), aldiz, 154 kasu zenbatu zituzten.
Zarautzen detektatu dituzte positibo gehien: 26. Hamahiru kasu zenbatu zituzten ostiralean, zazpi larunbatean eta sei atzo, igandea, eta une honetan, 742,46koa da kasu metatuen tasa (836,87koa izan zen aurreko asteburuan). Azpeitiak oso gertutik jarraitzen dio Zarautzi: 23 emaitza positibo izan dira, hain zuzen, hamar ostiralean, bost larunbatean eta zortzi atzo. 1195,62koa da intzidentzia tasa gaur-gaurkoz, aurreko asteburuan baino baxuagoa (1.222,19koa zen lehengo astelehenean).
Orion, bestalde, hamalau kasu berri topatu dituzte asteburuan; launa ostiralean eta atzo, eta sei larunbatean. Azken egunetako datuekin gora egin du Orion 100.000 biztanleko intzidentzia tasak, eta une honetan, 1253,92koa da.
Azkoitian eta Getarian hamaikana emaitza positibo izan dira asteburuan: Azkoitian bi kasu atzeman zituzten ostiralean, lau larunbatean eta bost igandean, eta Getarian, bost ostiralean, bi larunbatean eta lau igandean. Getarian positiboen kopuruak zertxobait gora egin badu ere (astelehenetik ostegunera bitartean zazpi izan ziren), Azkoitian nabarmen egin dute behera kasuek (42 positibo zenbatu zituzten astelehenetik ostegunera bitartean). Aian eta Errezilen ere izan dira emaitza positiboak asteburuan: bi Aian eta bat Errezilen.
Ostiraletik igandera arteko zenbatekoak kontuan hartuta, hala ere, eskualdeko bost herritan jarraitzen du piztuta semaforo gorriak: Azkoitian, Azpeitian, Orion, Zarautzen eta Zumaian.
Intzidentzia tasa behera Araban, Bizkaian eta Gipuzkoan
COVID-19a atzemateko 38.834 proba egin dituzte Araban, Bizkaian eta Gipuzkoan joan den asteburuan. Horietatik 3.087 izan dira emaitza positiboak; hain zuzen, 1.234 ostiralean, 1.043 larunbatean eta 801 atzo. Aurreko asteburuan PCR eta antigeno gutxiago egin zituen Osakidetzak, 38.498, eta gehiago izan ziren detektatutako positiboak: 3.867. Hortaz, behera egin du positibotasun tasak Araban, Bizkaian eta Gipuzkoan. Gaur-gaurkoz %7,8koa da ehunekoa, eta aurreko astelehenean, azaroak 8, %9,8koa.