"Gurasoak heziketa prozesuan inplikatzea eta horretarako bidelaguntza eskaintzea, eta gurasoen arteko sare berriak sortzea dira Zumaiako Guraso Eskolaren helburuak", udalak azaldu duenez. Udaleko Gizarte Zerbitzuek eta Hezkuntza sailak elkarlanean antolatutako programa da, eta 0 eta 18 urte bitarteko haur eta gazteen gurasoei zuzenduta dago. Hiru talde desberdinetan banatuta, adin-tarte bakoitzaren ezaugarrietara egokitutako formakuntza jasotzeko aukera izango dute Zumaiako gurasoek.
Guraso Eskolan parte hartu nahi duten herritarrek gaurtik 30era bitartean eman beharko dute izena. Herriko ikastetxeek e-posta bidez zehaztutako moduan edo brankaharrera@zumaia.eus helbidera idatzi beharko da horretarako. Bi erreferente dauden kasuetan, biek parte hartzea gomendatzen dute antolatzaileek.
Matrikulak 20 euro balio ditu eta Kutxabankeko ES28 2095 5174 90 1060024873 kontu korrontean egin beharko dira sarrerak. Izen-emate orriarekin batera aurkeztu beharko da ordainagiria.
Bizipen tailerrak (0-6 urte bitartekoen gurasoentzat):
0 eta 6 bitarteko haurren gurasoek bizipen tailerretan parte hartu ahal izango dute, otsailaren 13an eta 27an. Bigarren talde bat osatzen bada, martxoaren 20an eta 27an errepikatuko dute tailerra. Aurtengoan ere Jon Urdineta eta Itziar Rosado psikomotrizistek gidatuko dituzte saioak, eta haurra ulertzeko tresnak eskuratu eta guraso izatearen inguruan hausnartzeko aukera izango dute partaideek.
Tailer hauen inguruko informazioa hemen eskuratu daiteke.
Elkarbizitza familian eta lagunartean (6-11 urte bitartekoen eta 12-18 urte bitartekoen gurasoentzat):
6 urtetik 18 urtera bitarteko gurasoek familia eta lagunarteko elkarbizitza landuko dute Izar Arregi psikologo-terapeutarekin. Lau larunbatetan egingo da ikastaroa (otsailaren 6an eta 20an, eta martxoaren 6an eta 13an) eta saio bakoitzak ordu eta erdiko iraupena izango du. Bi talde osatuko dituzte: 6 eta 11 urte bitartekoen gurasoena (10:00etatik 11:30era), eta 12 eta 18 urte bitarteko gurasoena (12:00etatik 13:30era).
Adin-tarte bakoitzaren berezitasunak kontutan hartuta, bi taldeek honako gaiak landuko dituzte: lagunarteko harremanak eta Covid garaiko harreman mota berriak, guraso moduan lagunarteko harremanetan duten paperaren inguruko hausnarketa, edota teknologia berrien eragina, besteak beste. Ikastaroak diziplina positiboa lantzeko gakoak eskainiko dizkie gurasoei, familiako elkarbizitza hobetzeko asmoz.
6 eta 11 urte bitarteko gurasoentzako informazio orria hemen eskuratu daiteke; 12 eta 18 urte bitartekoentzakoa, hemen.