Eusko Jaurlaritzak eremu gorrian dauden udalerrietako tabernak eta jatetxeak ixteko emandako agindua tarteko, otsailaren 4an auzitara jo zuten Araba, Bizkai eta Gipuzkoako ostalarien elkarteek, eta gaur, asteartearekin, iritsi da auzitegiaren erantzuna: EAEko Auzitegi Nagusiak ebatzi du berriz ere zabal ditzaketela eremu gorrian diren herrietako ostalaritza guneak. Auzitegiak hartutako erabakia tarteko, bihar bertan zabaldu ahal izango dituzte herri guztietako tabernak eta jatetxeak.
Erabakia behin-behinekoa da; izan ere, auzitegiak gaia sakonago aztertuko du datozen egunetan. Gainera, tabernak zabalduko badituzte ere, Jaurlaritzak onartutako dekretua indarrean da, eta beraz, hainbat neurri bete beharko dituzte ostalaritza guneek: besteak beste, 20:00etan itxi beharko dituzte, edukiera murriztu beharko dute, mahaietan eseritako pertsonen arteko distantziak bermatu beharko dituzte, mahaiko lau lagun baino ez dira eseriko eta barran ezingo da kontsumitu.
Zumaiaren kasua ez bada ere, aurreko astean ireki baitzituzten ateak, Urola Kostako hainbat herritan daude itxita tabernak eta jatetxeak, 5.000 biztanletik gorako herri horietako COVID-19aren hamalau eguneko intzidentzia tasa 500etik gorakoa delako, edo 5.000 biztanletik beherako herrien kasuan, intzidentzia altua duelako. Hain zuzen ere, gaurko egunez itxita daude Azpeitiko, Orioko nahiz Aia.
"Ulertezina"
Auzitegiak hartutako erabakia "ulertezina" eta "bereziki larria" dela azaldu du Bingen Zupiria Eusko Jaurlaritzako bozeramaileak gaur arratsaldean egindako agerraldian. Arabako, Bizkaiko eta Gipuzkoako egoera "oso larria eta kezkagarria" dela adierazi du, eta EAEko Auzitegi Gorenak hartutako erabakiaren ondorioz, Jaurlaritzak izurriteak eragindako egoera hobera eramateko "tresna bat gutxiago" izango duela ere gaineratu du.
Jaurlaritzaren zerbitzu juridikoek epaia aztertuko dute, eta haiek erabakiko dute helegitea jarri ala ez.