Urola Kostako Gazte Koordinadora Sozialistak (GKS) urtarrila amaieran aurkeztu zuen kanpaina berri bat, Haserrea antolatu, askatasunak hedatu lelopean. Pandemia testuingurua aztertuta, bi auzi nagusi jarri zituzten jo-puntuan GKSko kideek: batetik, hainbat mekanismoren bidez (esaterako, "masa-hedabideen" bidez) gazteria "kriminalizatzen" ari direla salatu zuten eta, bestetik, larrialdi egoera "baliatuta", "kontrol soziala eta poliziaren jazarpena nabarmen hazten" ari direla seinalatu zuten.
Bigarren auzi hori lantzeko, bi saio antolatu dituzte hurrengo asterako, Zumaian bata eta Zarautzen bestea. Hurrengo larunbatean, otsailaren 20an, izango da Zumaiako saioa: aholkularitza juridikoa eskaintzeko tailerra. Saio horretan, hain zuzen, polizien "jokabide arbitrarioen aurrean babestu ahal izateko oinarrizko informazioa partekatuko" dute hizlariek, hainbat galdera-erantzun oinarri hartuta: "Noiz eska diezadakete identifikatzeko? Nola jokatu tentsio egoera baten aurrean?". Torreberri gaztetxean izango da tailerra, 17:00etan hasita.
Urola Kostako GKSk protestara deitu zuen Zarautzen joan den larunbaterako, "osasun-hondamendia" eta horri ematen ari zaion "aterabide poliziala" salatzeko. Osasun-krisiari, "osasun-baliabideen horniduraz aurre egin" beharrean, gobernuek "kriminalizazioaren, errepresioaren eta askatasunen ezabapenen bitartez" erantzun nahi diotela adierazi zuten GKSko kideek.