Euskadiko Angulero Elkarteak argitara eman duen oharraren arabera, “Euskadiko arro guztietako anguleroak” biltzen ditu sortu berri den elkarteak. Anguleroak “aurrerapauso” bat eman nahi izan dute, “angularen kudeaketa defendatu eta bertan parte hartu ahal izateko”.
Angula harrapatzen den Gipuzkoako eta Bizkaiko arro guztietako ordezkariak ditu elkarteak, eta ia berrehun partaide dira guztira; lehorretik eta anguletarako motorrarekin uretatik jarduten dutenak, bietako ordezkariak. “Gehiago ere izango gara aurrerantzean, jendea orain ari delako batzen”, azaldu dute.
Anguletan ibiltzen den orori deia luzatu diete, bai eta “Euskadin hain tradiziozkoa den den arrantza hori babestu nahi dutenei ere”, elkartera batzera gonbidatuz.