Eusko Jaurlaritzako Osasun Sailak kaleratu ditu atzoko PCR eta antigeno probetako emaitzak. Urola Kostan zortzi kasu positibo detektatu dituzte atzoko probetan, duela astebete baino bi gehiago. Hain zuzen, lau lagunek eman dute positibo Azpeitian, bik Zarautzen eta banak Zestoan eta Zumaian.
Beste kasu bat detektatu zuen Osasun sailak atzo Zumaian. Horrek ez du eraginik izan 100.000 biztanleko azken hamalau egunetako intzidentzia tasan; bezperako tasa bera du Zumaiak, 183,17 puntukoa.
Azpeitian lau emaitza positibo izan ziren herenegungo probetan ere, eta azkeneko datuak kontuan hartuta, gora egiten jarraitzen du 100.000 biztanleko hamalau eguneko intzidentzia tasak: 164,26koa zen ostiralean, 183,97koa atzo, eta 210,25ekoa gaur. Zarautzen, ordea, atzo kasu berriak atzeman zituzten arren, behera egin du intzidentzia tasak: 145,63koa zen atzo eta 128,5ekoa da gaur-gaurkoz.
Eremu horia izaten jarraitzen dute hiru udalerri horiek, baina ez dira egoera horretan dauden eskualdeko herri bakarrak. Atzokoan kasu berririk zenbatu ez bazuten ere, semaforoko argi horia piztuta dago oraindik Azkoitian nahiz Orion. Intzidentzia tasa 75,11koa da Azkoitian, eta 163,08koa Orion.
Aian, Aizarnazabalen, Beizaman, Errezilen eta Getarian ez zen kasu berririk izan atzo.
425 kasu Hego Euskal Herrian
Atzo, astelehena, COVID-19a atzemateko 10.268 proba egin zituzten Hego Euskal Herrian. Emaitzetan 190 positibo berri detektatu dituzte Bizkaian, 110 Gipuzkoan, 62 Araban, lau beste lurralde batzuetan eta 59 Nafarroan; alegia, 425 guztira. Positibotasun tasari dagokionez, %4,3koa izan da Araba, Bizkai eta Gipuzkoan, eta %3,4koa Nafarroan. Behera egin du, beraz, positibotasun tasak: herenegungo emaitzetan %4,7koa izan zen Araba, Bizkai eta Gipuzkoan, eta %5,4koa Nafarroan.
Une honetan 121 pertsona daude Araba, Bizkai eta Gipuzkoako ZIUetan. Atzokoan 36 pertsona ospitaleratu zituzten, eta guztira, 268 lagun daude Osakidetzako erietxeetan.