Espainiako Gobernuak alarma egoera indargabetu zuen aurreko astean, eta Eusko Jaurlaritzak dekretu berria argitaratuta, zenbait aldaketa jarri dituzte martxan Zumaian ere. Esaterako, hemendik aurrera lehengo ordutegia izango da kiroldegian, eta kultur ekimenetan aldaketak izango direla ere jakinarazi du Zumaiako Udalak.
Beste hainbat irizpide, dena den, berdin mantenduko ditu. Hain zuzen, azaldu du indarrean jarraituko dutela aforoari lotutako neurriek, bai udal ekipamenduen erabilerarako, bai udalak berak antolatutako askotariko ekitaldietarako. "Bestelako segurtasun neurriei dagokienez" ere "ez da aldaketarik izango", udalaren esanetan. "Aurretik ere legeak zehaztutako babes-neurriak baino zorrotzagoak aplikatzen ziren, eta oraindik ere, egoera hobetu ezean, berdin mantenduko dira", adierazi du.