Beheranzko joerarekin jarraitzen dute positibo kopuruek. Eusko Jaurlaritzaren Osasun Sailak argitaratu berri ditu ostiraletik igandera bitartean egindako PCR eta antigeno proben emaitzak, eta Zumaian ez dute kasu positibo bat bera ere baieztatu. Herria eremu laranjan zegoen asteazkenaz geroztik, baina asteburuko datu baikorren ostean 193,34an dago kasu metatuen tasa. Hortaz, eremu horira igaro da Zumaia.
Joan zen asteburuarekin alderatuta, dezente jaitsi dira kasuak, orokorrean, Urola Kostan. Guztira, 26 positibo berri atzeman dituzte eskualdeko herrietan azken hiru egunetan —joan zen asteburuan 79 izan ziren—, eta kasu horietatik gehienak Zarautzen izan dira, hamahiru gaixorekin; ostiralean bat, larunbatean hiru eta atzo bederatzi. Edonola ere, Urola Kostako herririk handienean nabarmen egin du behera 100.000 biztanleko azken hamalau egunetako intzidentzia tasak, eta gaur-gaurkoz 214,16koa da; oraingoz eremu horian dago.
Zarautzen ondoren, Azkoitian eta Azpeitian zenbatu dituzte kasu gehien, seina kasurekin. Azkoitian, lau kasu hauteman zituzten ostiralean, larunbatean bat ere ez, eta atzo bi. Joan zen asteburuarekin alderatuta, Azkoitiko intzidentzia tasa ere beheraka hasi da, eta une honetan 500,71n kokatu da, 350 puntu jaitsita –851,21ekoa zen aurreko astelehenean–. Hala ere, eremu gorrian jarraitzen du. Azpeitian hautemandako sei kasuei dagokienez, bi ostiralean izan ziren, hiru larunbatean eta bat atzo, eta eremu laranjan jarraitzen du 302,23ko intzidentzia tasarekin. Azkenik, Zestoan kasu bat detektatu zuten larunbatean, eta bere positibotasun tasa 282,449koa da.
Eskualdeko gainerako herrietan ez da positibo kasurik izan asteburu osoan. Orio eremu berdean sartu da, eta bere tasa 16,31koa da. Beste udalerriak inolako eremu kritikotan ez zeuden arren, beraien intzidentzia tasek ere nabarmen egin dute hobera: Aian 50,38koa da, Aizarnazabalen 130,04koa, Getarian 106,01koa eta Errezilen 1127,21koa. Beizaman intzidentzia tasarik gabe jarraitzen dute.
Hego Euskal Herrian, hobera
Eskualdean bezala, Hego Euskal Herrian kutsatzeek beherantz egin dute. Lau lurraldeetan, guztira, 6.345 PCR eta antigeno egin zituzten atzo, eta horietatik 288 izan ziren positiboak. Lurraldez lurralde, Bizkaian zenbatu zituzten positibo gehien (125), eta ondoren, Gipuzkoan (88), Nafarroan (47) eta Araban (25). Positibotasun tasari dagokionez, %4,6 izan zen Araban, Bizkaian eta Gipuzkoan, eta %4,2 Nafarroan.
Ospitaletako egoerak ere nabarmen egin du hobera. Arabako, Bizkaiko eta Gipuzkoako erietxeetan, guztira, 214 pertsona daude COVID-19 gaitzagatik, eta ZIUetan, 124. Nafarroako Gobernuak ez du oraindik eman ospitaleratzeei buruzko datu eguneraturik.