Eusko Jaurlaritzako Osasun Sailak duela minutu gutxi jakinarazi du txosten bidez, atzo, asteazkena, PCR eta antigeno testetan herriz herri zenbat kasu positibo atzeman zituen. Datuen arabera, beste zortzi positibo zenbatu dituzte Zumaian. Intzidentzia tasari dagokionez, eskualdeko daturik okerrena da herrikoa, eta eremu gorrian sartuta jarraitzen du. Azken orduetako datuekin, tik 732,68ra igo da kasu metatuen tasa.
Urola Kostan, guztira, 29 positibo baieztatu zituzten atzo, herenegun egindako probetan baino sei gehiago. Eskualdeko positiboen herena Azkoitian zenbatu dute. Han hamar positibo jakinarazi ditu Osasun Sailak, eta 175,25eko intzidentzia tasa du gaur-gaurkoz. Duela bi egun Araba, Bizkai eta Gipuzkoako 5.000 biztanleko herrien artean egoera onena zuen herria zen Azkoitia.
Zarautz, Azpeitia, Aia, Aizarnazabal eta Orio artean hauteman dituzte gainerako positiboak. Zarautzen sei kasu izan dira, Azpeitian bi eta bana Aian, Aizarnazabalen eta Orion. Zarautz, Azpeitia eta Orio eremu horian daude; Zarautzen 248,43ko tasa dute, 223,39koa Azpeitian eta 130,46koa Orion. Aian –50,38– eta Aizarnazabalen –260,08– ere intzidentzia tasak gora egin du herri bakoitzean positibo bana zenbatuta. Zestoan, bestalde, 154,08koa da datu horren zenbatekoa.
Positiboak gora, ospitaleak egonkor
Hego Euskal Herrian ere datuak mardulak dira gaurkoan. 900 positiboko langa –905 positibo zehazki– gainditu zen atzoko egunean Bizkaiko 294, Gipuzkoako 260, Nafarroako 256, Arabako 62 eta lau lurralde horietatik kanpo bizi diren 33 kasu positiborekin. Nafarroako positibotasun tasak altua izaten jarraitzen du egun. 1.811 PCR eta antigeno test egin zituzten eta tasa %14,1ean kokatu zen. Araba, Bizkai eta Gipuzkoan, bestalde, %7an dago positibotasun tasa 9.260 proba egin ondoren.
Positiboak gora egiten ari diren arren, oraingoz Osakidetza ez da ospitaleetan gaixoak pilatzen ari. Izan ere, zainketa berezia behar duten pertsonak 25 dira gaur, atzo bezala. Hemezortzi pertsona ospitaleratu zituzten atzo Osakidetzaren mendeko erietxeetan, eta egun 50 lagun dira ospitalean daudenak, atzo baino bat gutxiago. Gaixotasunaren zabalkundea adierazten duen oinarrizko birsorkuntza tasa edo R0 indizeak, berriz, behera egin du, eta 1,45ean dago gaur. Araba, Bizkai eta Gipuzkoako intzidentzia tasak 21 puntu egin zuen gora atzo, eta 224,71koa da gaur-gaurkoz.