Donostian egin dituzte mobilizazioak, elkarretaratzeak eta auto karabanak, esaterako. Luze doa langile hauen borroka eta azaldu dutenez, ez dute "txalorik edo alabantzarik" nahi, "soldata eta lan baldintza duinak" baizik. "Oso garai gogorrak bizitzen ari gara. Pandemiak arduratsu jokatzea eskatu digu bai langile eta bai herritar bezala".
Gaineratu dutenez, beste arlo batzuetako langile askok baino "presio handiagoa" jasaten ari dira. "Gure eguneroko lana ez da erraza, izan ere, ezintasuna, gaixotasunak, etsipena eta heriotza bera ere kudeatu behar izaten dugu. Egoitzek ez dute 'Next Generation' proiektu handietatik dirurik jasotzen, baina bertan bizi diren egoiliarrengatik ez balitz, ez litzateke gaur egun bizi dugun egoera ekonomiko eta soziala posible izango".