Euskarazko komunikazioaren munduko ia 100 profesionalek eman dute izena dagoeneko datorren ostiralean, azaroak 12, Tokikomek Arrasateko Garaia parke teknologikoan antolatu duen ekitaldirako. Bertan, Tokikom Sariak banatzeaz bat, Komunitatea josten jardunaldiak ere egingo dituzte, hedabideen epe labur eta ertaineko erronken inguruan jarduteko.
76 toki komunikabide batzen dituen Tokikom taldeak Tokikom Sariak sortu zituen duela sei urte, euskarazko toki komunikabideen lan bikaina gizarteratu eta aldarrikatzeko xedez. Urtero bezala, urtean zehar euskarazko toki komunikabideetan argitaratutako azalik onena, edukirik onena eta ikus entzunezkorik onenaren saria banatuko dira ostiraleko ekitaldian, eta gainera publikoak bozketa bidez erabakitako Komunitatearen Saria ere bai. Epaimahaia Euskal Herriko Unibertsitateko Edorta Aranak eta Maria Gorosarrik eta Mondragon Unibertsitateko Amaia Pavonek osatu dute eta, nabarmendu dutenez, "igarri da pandemiak aukera eman duela lanketak era pausatuago batean egiteko". Finalista geratu diren lanak hemen ikus daitezke.
Komunitatea josten jardunaldia
Sariek batzeko ematen duten aitzakia probestuz, Tokikomek jardunaldi bat ere antolatu du, euskarazko komunikabideetako profesionalei zuzendutakoa. Komunitatea josten izenburuarekin, tamaina ezberdinetako komunikabideen zein komunikabide horien eta haien publikoaren artean komunitatea osatu eta harremanak estutzeko aukerak aztertuko dituzte, nazioarteko adituen eskutik.
Tokikomeko zuzendari Alaitz Artolazabalek munduan gertatzen denari adi egotearen garrantzia azpimarratu du: "Garrantzitsua da geure bide berean pausu bat edo bi aurrerago doazenen esperientziak ezagutzea, beraiek hartutako erabaki on eta txarretatik ere ikasteko".
- BBCren Local News Partnerships egitasmoa: Alde batetik, BBC irrati-telebista publikoa Britainia Handiko toki komunikabideekin garatzen ari den Local News Partnerships egitasmoaren berri izango da, egitasmoa zuzentzen duen Matthew Barraclough-en eskutik. Tokikomek eta EiTBk denbora daramate egitasmo hori aztertzen, Euskal Herrian antzeko ekimenen bat abiatzeko aukerak baloratzeko.
- Eldiario.es-en kidetza programa: Madrilgo Eldiario.es egunkari digitala ezaguna da mundu mailan bere kidetza programa arrakastatsuagatik. Nagusiki digitala den komunikabideak lan bikaina egin du bere kideen figura garatzeko, harpidedun soilaren figura gainditu eta benetako komunitate baten parte izan daitezen. Kidetza programa zuzentzen duen Esther Alonsok emango du haren berri xehetua.
- Het Belang van Limburg: Euskarri anitzeko planteamendua Flandriatik, Het Belang van Limburg egunkari hiperlokalak ere lanketa sakona egin du kideen figura uztartzeko lantzen dituen euskarri ezberdinekin: papera, webgunea eta aplikazioa. Bertako kide den Arno Schepersek azalduko ditu xehetasunak jardunaldian.
Tokikomek EiTBren laguntzaz eta Nafarroako Gobernuaren, Eusko Jaurlaritzaren eta Bizkaiko zein Gipuzkoako Foru Aldundien babesaz antolatu ditu sarien seigarren edizio hau eta ekitaldia bera. Aipatu bezala, jardunaldia azaroaren 12an izango da, Arrasateko Garaia parke teknologikoan. Sarrera doakoa izango bada ere, ezinbestekoa da aldez aurretik izena ematea, segurtasun protokoloak betetzeko. Izen-ematea azaroaren 10ean itxiko da, eta Tokikomen webgunetik egin daiteke.
UKTren lau lan, finalisten artean
Urtero bezala, komunikazioaren munduko adituek osatutako epaimahai batek hiru sari emango ditu Tokikom Sarietan, azken urtean euskarazko toki komunikabideetan argitaratutako lanik onenak aitortzeko. Epaimahaia arduratuko da komunikabideek proposatutako 57 lanen artean azalik onena, edukirik onena eta ikus-entzunezkorik onena aukeratzeaz.
Aurtengo edizioko lan finalisten artean daude Urolako Komunikazio Taldeak (UKT) argitaratutako lau: Azkoitiko Maxixatzen aldizkariko azal bat eta erreportaje bat, GUKA gehigarriko erreportaje bat eta Orioko Karkara aldizkariko azal bat.