Adinekoen egoitzetako langileek beraien aldarrikapenekin jarraitzen dute, eta bihar 258. greba eguna egingo dute. Lau urteko gatazka honen ondoren, egoera "gero eta larriagoa eta jasangaitzagoa" dela azaldu du ELA sindikatuak.
Egoerak, gainera, pandemiarekin okerrera egin duela ere nabarmendu du sindikatuak. "Pandemiak eta bere ondorioek lehen prekarioak ziren lan baldintzak okertzea besterik ez du eragin, eta lehen langile kopurua eta ratioak oso eskasak zirela salatzen bagenuen orain egoera are eta okerragoa da, ez direlako ordezkapenak egiten". ELAren esanetan, "lan baldintzak hain dira gogorrak inork ez duela egoitzetan lan egin nahi". Egoitzetan ematen den zerbitzua "gero eta okerragoa" dela azpimarratu du, eta Aldundiak, egoitzen arduradunak, "beste aldera" begiratzen duela.
Aldundiarekin azken bilera otsailaren 14an egin zutela azaldu du. "Langile, sindikatu, senide eta eragile ezberdinek eginiko bilera eskaerari Aldundiak ez dio erantzun ere egin, beste behin ere bere jarrera antidemokratikoa eta egoerarekiko utzikeria erakutsiz". ELAren iritziz, patronalak "inoiz baino negozio handiagoa" egin du pandemiak sortutako egoeraren "eta Aldundiaren utzikeriaren kontura".
Sindikatuak nabarmendu duenez, borrokan jarraituko dute "ez egoiliarrek ez langileek ez dutelako merezi bizitzen ari direna. (...) Ez dugu etsiko egoera honi buelta emateko beharrezkoa den Aldundia eta Patronalen jarrera aldatu arte".