Litografiak eta akoaforteak, bideoak eta argazkiak. Teknika ugarirekin egindako lanak jasotzen dira Carmen Palomeroren (Burgos, Espainia, 1957) erakusketa honetan. Aurrez ere izan da artista hau Oxford aretoan bertan, baina Alondegia eraberri gabe zegoenean oraindik. Horren lekuko dira erakusketa honetan zintzilikatu dituen argazki batzuk.
Ostegunean egindako irekiera ekitaldian azaldu zuenez, denbora, memoria eta identitatea dira bere lanak egitera eramaten dituen gaietako batzuk. "Zu zeu ezagutzeko balio du, baita besteak ezagutzeko ere", azaldu zuen. "Obrak erregistroak dira, dagoeneko esperimentatuta dauden kontzeptuen, espazioen eta denboren edukiontziak, eta, aipuak balira bezala, diskurtso berriak sortuz hitz egiten dute".
Artelanak egiteko naturan aurkitzen dituen gaiak eta produktuak erabiltzen dituela ere nabarmendu zuen Gaztela eta Leongoak. Lanak sortzeko ideia hori, erakusketan ikus daitezkeen artelanetan atzeman daiteke. Bere esanetan, "aretoko espazioa gabarra handi bat dela irudikatu dut, garrantzitsuena gordetzen duena".