Ohorezko erregional mailara igotzeko itzulerako partida jokatu zuten larunbatean gorengoen mailako Zumaiakok eta Lagun Onakek. Joanekoan, pasa den asteburuan Azpeitian jokatutako partidan, Lagun Onakek irabazi zuen 1-0 emaitzarekin, eta Zumaiakok bi goleko aldearekin irabazi beharko zien azpeitiarrei mailaz igo nahiko bazuten.
Aita Mari futbol zelaiak une handietako itxura erakutsi zuen; goraino bete ziren harmailak eta zelaiaren buelta guztia ere. Zumaiakoren zaletuei Azpeititik etorritakoak gehitu behar zaizkie. Taldeek zaletuen bultzadarik izan ez zutela ezin esan.
Ametsak amets dira, baina batzuetan errealitateak zaplateko ederrak ematen ditu, eta Zumaiakok hasieratik erasora jo bazuen ere, golak kostakoen atean erori ziren. Partida hasi eta ordu erdirako bi golengatik ari ziren irabazten azpeitiarrak. Horiei aurreko astean jasotakoa gehitzen bazaie, lau gol sartu behar zituen igoeraren ametsa berresteko. Eta ez zen posible izan. Saiatu ziren Lagun Onaken atearen aurrean, baina ez ziren gai izan hura zulatzeko. Partida 0-2 emaitzarekin amaitu zen Azpeitiko taldearen alde.
Denboraldi galanta egin du Zumaiakok. Bere multzoko lehenak izan dira, eta ohore osoz sailkatu ziren, denboraldia amaitu baino lehen, igoera fasea jokatzeko. Oraindik beste aukera bat geratzen zaio helburua erdiersteko. Beste multzoko norgehiagokan galtzaile suertatu zen taldea, Beasain, izango du aurkari.
Argazkiak: Arnaitz Rubio Aprea.