Goikoetxea eta Irastorza Barandika eta Etchetoren aurka neurtu ziren jaialdiko lehen partidan. Lehen jardunaldian galtzaile suertatu ziren Goiko eta Iparraldeko puntistak osatutako bikotea, eta 2-0 emaitzarekin irabazi behar zuten finalerdietara pasatzeko.
Ez zen hala izan. Barandikak eta Etchetok 10-15 emaitzarekin irabazi zuten lehen seta. Ondorioz, Goikoetxea eta Irastorza txapelketatik kanpo geratzen ziren. Hala ere, partida irabazi nahi izan zuten; bigarren setan 15-12 emaitzarekin irabazi zuten, eta berdinketa hausteko set laburra 5-3 emaitzarekin.
Omenaldien ondoren, B multzoko partida jokatu zuten Beaskoetxea-Lopez eta Olharan-Del Rio neurtu ziren. Biak ala biak sailkatuta zeuden finalerdiak jokatzeko, eta multzoko lehen postuan zer bikote geratuko zen zegoen jokoan. Beaskoetxea eta Lopez izan dira multzoko lehenak partida 2-0 emaitzarekin irabazi ondoren.
Datorren larunbatean, hilaren 4an, jokatuko dira txapelketako finalerdiak Balda pilotalekuan: Barandika eta Etcheto Olharan eta Del Rioren aurka arituko dira, eta Beaskoetxea eta Lopez Aritz Erkiaga eta Lekerikaren aurka. Jaialdia 17:00etan hasiko da, eta sarrerak www.eventbrite.com webgunean eros daitezke.