Jostailuak eta bestelako opariak ekarriko dizkie Olentzerok Gabon hauetan herriko haur askori. Izango dira, baina, arrazoi batengatik edo bestearengatik aurten oparirik jasoko ez duten haurrak. Hori dela eta, beharrean dauden haur horiek ere Olentzeroren bisita izan dezaten, jostailuak, DVDak, panpinak eta bestelako jolasak bilduko dituzte Zumaiako Herri Eskolan.
DBH 3 DC-ko ikasleek abiatu dute jostailu bilketa hau, eta herritar orori deialdian parte hartzera gonbidatzen diete. Jostailuak, mahai jolasak, panpinak, kotxe txikiak, DVDak, etab. eman ahal izango dira. Bilketa abenduaren 21era bitartean egingo da, eta Sagarbide eraikineko sarreran utzi ahal izango dira.
"Bildutako jolasak beharra duten haurren artean banatuko dira haiek ere Olentzeroren bisita izan dezaten", azaldu dute kanpainako sustatzaileek.