Bilboko Areatzako ibiltokiak hartu zuen atzo gizonezkoen Bizkaiko I. mailako trontza txapelketa. Lau bikote aritu ziren lehian, eta horien artean ziren Mikel Agirre ondarrutarrak eta Andoni Zubiaurre zumaiarrak osatutakoa. Parte hartu bakarrik ez, beraiek izan ziren lana burutzen azkarrenak eta, ondorioz, irabazlearen txapela jantzi zuten.
Mutrikun jaioa, Zumaian bizi da Gorixo izengoitiz ezaguna den Andoni Zubiaurre. Bizitza osoan herri kiroletan aritua, arraunean ere aritu zen Zumaiako Arraun Elkartean; bost urtez egin zuen arraunean Zumaiako ontzietan.
Gipuzkoarra izanda ere, Bizkaiko Herri Kirolen Federazioan egin behar izan du fitxa, "Gipuzkoa mailan txapelketarik egiten ez delako. Azken zortzi bat urteetan ez, behintzat", azaldu du Zubiaurrek. Bizkaiko federazioan osatu zuen fitxa eta, ondorioz, lurralde horretako txapelketetan parte hartu dezake.