Gabon gaua da gaur, eta Olentzerok ez du hutsik egin. Opariak banatu aurretik, herriko haur eta gaztetxoek bisitan izan dute ikazkina.
Zanpantzarrak buru zirela abiatu da kalejira Beheko plazatik eguerdi partean, eta atzetik jarraitu dituzte trikitilariek eta pandero jotzaileek. Erdian, gaurko protagonista, Olentzero, traktore baten gainean herritarrak agurtzen; atzetik, herritar ugari kantuan.
Erribera kalea zeharkatu, eta Arbustaingo Arranplan geldialdia egin dute. Izan ere, batel batean iritsi da Olentzeroren laguntzaile Gomezago, eta kalejirara batu da. Amaia plazaraino jarraitu dute, eta bertan, Gomezago buruhandi abestiarekin banatu dizkiete karameluak haurrei.
Arratsaldean ere Gabonekin lotutako ekitaldi ugari izango da. Gabon Korua kalejiran aterako da urtero legez, Beheko plazako jaiotzaren irekiera ekitaldia ere izango da, eta baita Gabonetako abesti lehiaketa ere.