LGTBI+ pertsona batzuentzako babeslekua da armairua; beste batzuek askatasuna aurkitzen dute handik ateratzen direnean. Armairura igota, kontu horien inguruan hausnartu eta hitz egin dute Laura Iparragirre, Kimetz Etxabe, Idoia Zabala eta Aritz Irure zumaiarrek sentsibilizazio kanpainaren barruan prestatutako bideoan.
Bideoaren bi bertsio osatu dituzte. Bat, laburra, bi minutu ingurukoa, sare sozialen bidez partekatuko dute. Bestea, luzeagoa, lanketa desberdinak egiteko baliatuko dutela iragarri dute kanpainaren aurkezpenean.
2022ko azaroan aurkeztu zuen Udalak Zumaiako Eihera kooperatibarekin batera diseinatutako LGTBI+ pertsonen bizi baldintzak hobetzeko plana. 45 ekintza konkretsuz osatzen den plan hark sei helburu edo erronka zehaztu zituzten: ikusgarritasuna, sentsibilizazioa eta aitortza; eskuragarritasuna; sozializazioa eta partehartze komunitarioa; indarkeria gabeko bizitzak; akonpainamendua, zaintza eta babesa; eta zeharkakotasuna.