Abian da Julene Azpeitia ipuin lehiaketaren 36. edizioa, eta irailaren 30era bitartean izango dute herritarrek lanak aurkezteko aukera. Euskarazko literatur sorkuntza bultzatzea eta indartzea xede duen lehiaketa da Zumaiako Udalak antolatutakoa.
Ipuinen gaia librea izango da, eta euskara hutsean sortuak izan beharko dute. Horrez gain, ez dituzte onartuko aurrez argitaratutako lanak, eta horiek, gutxienez, sei orri izan beharko dituzte.
Lanak bi eratara aurkeztu ahal izango dituzte herritarrek: alde batetik, Zumaiako udaletxera posta bidez bidalita, eta, bestetik, euskara@zumaia.eus helbidera bidaliz.
Zumaiako Udalak izendatutako epaimahaiak hiru sari banatuko ditu aurtengoan: 3.000 euroko saria lehenengo irabazlearentzat, 1.500 eurokoa bigarrenarentzat eta mila eurokoa hirugarrenarentzat.
Julene Azpeitia ipuin lehiaketaren inguruko oinarri eta xehetasun guztiak ikus daitezke honako esteka honetan.