Festa giroan murgilduta dago herria gaurkoan, Euskal Jaien aitzakian. Hasteko, goiz osoan zehar, askotariko postuak jarri dituzte Alde Zaharreko azokan; jatekoa, baserritar jantziak, otarrak eta beste hainbat produktu eskuratzeko aukera izan dute bertaratu direnek.
Jarraian, eguerdi partean, Oihana Iguaranek eta Sustrai Colinak bi bertso saio eskaini dituzte balkoitik balkoira; bata, udaletxean, eta, bestea, Kofradian. Bertsoak amaitzean Eusebio Gurrutxaga plazan batu dira herritarrak, herri bazkarirako. Halaber, goiz osoan zehar ez da musika eta dantzarako tarterik falta izan.
Bazkalostean izango du jarraipena festa egunak, Joxe Mendizabalen dantzaldiarekin, Soinuz Blai taldearen dantzaldiarekin eta sagardo dastaketarekin, besteak beste.
Honako hau da arratsalderako udalak prestatu duen egitaraua:
- 18.00. Joxe Mendizabalekin haurrentzat dantzaldia, Amaiako plazan.
- 18.00. Erkibe kultur elkartearen eskutik taloak, Odietan. 18.30. Soinuz Blai taldearekin dantzaldia eta Sutan Txarangarekin kalejira, Eusebio Gurrutxaga plazan.
- 19.00. Sagardo dastaketa.
- 22.30. Joselu Anaiak taldearekin dantzaldia.