Emaitza apartak lortu ditu Irati Osak asteburuan Trasonan (Asturias, Espainia) jokatutako piraguako probetan. Bigarren postu bat eta bi lehenengo postu lortu ditu eta abuztuaren 31tik irailaren 3ra Vejenen eta Koldingen (Danimarka) jokatuko dituzten piraguako maratoiko hiru probetarako txartelak eskuratu ditu horrela.
Ostiralean, maratoi motzeko Espainiako Txapelketa jokatu zuen zumaiarrak eta zilarrezko domina jarri zuen. Eva Barrios irabazlearengandik hamabi segundora helmugaratu zen Osa 3.800 metroko proban hamabost minutu eta 26 segundoko denbora eginda.
Larunbatean eta igandean, berriz, Espainiako Kopako maratoiko probak izan zituen eta bietan izan zen azkarrena. Larunbatean bakarka aritu zen eta lehia estua izan zuen bigarren sailkatuarekin, segundo bakarra atera baitzion helmugan. Ordu bete 55 minutu eta 32 segundo behar izan zituen Itxas-Gaineko piraguistak 26,2 kilometroko ibilbidea egiteko. Igandean, azkenik, Cuencako (Gaztela Mancha) Piraguismo Taldeko Arantza Toledorekin osatu zuen bikotea eta bezperan baino lau minutu azkarrago osatu zuen ibilbidea. Orduan ere estua izan zen bigarrenarekiko aldea, segundo bakarrekoa, beste behin.