Maila handiko garaipena lortu du Janire Gonzalez Etxebarri surflari zumaiarrak Galizian. Pantin Classic Galicia Pro txapelketa irabazi du eta horrek Europako QS Qualifying Series zirkuiturako eman dizkion 3.000 puntuei esker, bigarren kokatu da.
Zumaiarra Camilla Kemp alemaniarraren kontra aritu da finalean eta aurkariaren olatu onena hobea izan den arren, erregularragoa izan da zumaiarra; izan ere, 12.90 puntu bildu ditu bi olatu onenak gehituta (6.57 + 6.33). Kempek, aldiz, 10.33 puntu lortu ditu (6.83 + 3.50). Aurrez, Tessa Thyssen frantziarra menderatu du Gonzalez Etxebarrik finalaurrekoan. Nagusitasunez egin du, gainera, zumaiarraren bi olatu onenak frantziarraren guztiak baino hobeak izan baitira.