Ikasturteko lehen saioa egingo du Irakurri Matte irakurle taldeak hilaren 12an, datorren asteartean. Uxue Alberdi idazle eta literaturzaleak gidatzen du irakurle taldea eta, datorrena hamabigarren ikasturtea du Zumaian. Urtero legez, hilean behin Alondegiko Moila gelan bilduko dira, irakurritakoak norberari sorrarazitakoa gainontzeko partaideekin partekatzeko.
Hori horrela, lehen saiorako hautatu duten eleberria Gaël Faye abeslari, rap musikari eta idazle ruandar-frantziarraren Ene herri txikia eleberria da. Horrenbestez, irailaren 12an 18:00etan bilduko dira taldekideak, ohi bezala, Alondegiko Moila gelan.
Era berean, udazkeneko irakurgaiak zeintzuk izango diren ere jakinarazi dute: urriaren 10ean Garazi Arrularen Lurraz beste aztertuko dute, idazlea bertan dela. Bestetik, azaroaren 14an, Sherwood Andersonen Winesburg, Ohio eta, urtea bukatzeko, abenduaren 12an, Bihurguneko nasa, Uxue Apaolaza bertan dela.