Zumaiako Udalak Beduako paduren berreskurapen lanetan dihardu 2019tik. Datorren aste hasieran, azken urteetako ekintzen berri emango du Aranzadi Zientzia Elkarteak. Azalpenak eta gero, Basusta ingurura joko dute, paduretako habitatak bertatik bertara ezagutzeko.
Horretarako, bi saio antolatu dituzte. Lehenengoa hurrengo astelehenean, hilak 9, 17:30ean. Euskaraz izango da saio hori, eta Alondegiko Moila gelan elkartuko dira. Bigarrena hurrengo asteartean izango da, hilak 10, 17:30ean hori ere. Kasu honetan gazteleraz izango da, eta Alondegiko Oxford aretoan elkartuko dira.
Partaide kopurua mugatua izanik, antolatzaileek azaldu dute beharrezkoa izango dela aurrez izena ematea. Horretarako bi aukera jarri dituzte: ingurumena@zumaia.eus e-mailera idaztea edo 943-86 50 33 telefono zenbakira deitzea.