Ahaidetasunez arituko dira bihar Zumaiako Emakumeon Etxean Emagin elkarteak antolatutako jardunaldian. Ahaidetasunen fikzioak eta utopiak du izena mintegiak eta erakusketa, solasaldia eta mahai-ingurua izango dituzte bertaratuko direnek.
Goizeko 9:00etan zabalduko dituzte Emakumeon Etxeko ateak, eta ordu erdi beranduago, 9:30ean Ama ta asuna erakusketa, dokumentalaren emanaldia eta ondorengo solasaldia izango da. June Baonza Pagaldaiek gidatuko du saioa.
Atsedenaldiaren ondoren, 11:15ean, mahai ingurua izango da eta bertan parte hartuko dute Jule Goikoetxea Mentxakak, Elixabete Imaz Martinezek eta Danele Sarriugarte Mochalesek. 13:00etan emango zaio amaiera jardunaldiari.