Oraindik ere guztiz konpondu gabeko argindar mozketak izan dira herrian azken marea bizien eraginez. Ondorioetako bat Gurrutxaga plazako gizarte zentroan (Hogarrean) pairatu dute, egun batzuetan bertako igogailua martxan ez zebilelako. Itsasargi zerbitzuko onuradunak izan dira kaltetuetako batzuk: hogarreko igogailua erabili ezin izan dutenez, Kantauri plazako Gaztetxolan izan dira pare bat egunez.
Herriko gazteei eskaintzen zaien zerbitzu hau ez zuten ezagutzen, eta Gaztetxolako gunera egokituta beste jarduera batzuk egin eta herrian gaztetxoentzat dagoen zerbitzua ezagutzeko aukera izan dute. Dena ondo bidean, ostegunetik aurrera gizarte zentroko bigarren solairuan elkartuko dira berriro.
Udaleko Gizarte Zerbitzuek hauskortasun egoeran dauden adinekoei zuzentzen dien zerbitzu bat da Itsasargi. Astelehenetik ostiralera 10:30etik 12:30era biltzen dira, eta pertsona baten laguntzarekin hainbat jarduera egiten dituzte mendekotasun egoerak atzeratzeko.