Zumaienan elkarlanean pentsatu, sortu eta argitaratu duten lehen ipuina aurkeztuko dute etzi: Magali. Arteak haurraren garapenari egin diezaioken ekarpenaz jakitun, sormena, elkarlana, euskararekiko maitasuna nahiz kultura-ekintzailetasuna landu dituzte proiektuaren bitartez, eta etxeko txikienei beren hazkuntza prozesuan aurrera egiteko xedea du, baita liburuekiko maitasuna elikatzekoa ere.
Bi ikasleren, ikasle-ohi baten, bi irakasleren eta eskolako ama baten arteko sare-lanaren emaitza da Magali, eta irakasleentzat ere inspirazio iturri izateko helburua ere badu. Xehetasun guztiak asteazkeneko aurkezpenean emango dituzte –Alondegiko Oxford aretoan izango da aurkezpena, 18:00etan– eta liburua bertan edo Zumaienako idazkaritzan eskuratu ahal izango da. Gaineratu dute Gabonetarako opari egokia dela ipuina.