Gabon garaia geroz eta gertuago dago, eta herriko elkarte eta eragileak dagoeneko ari dira jai horien bueltan antolatutako ekitaldien prestaketa lanetan. Erkibe kultur elkarteak, esaterako, Gabonetako abestien lehiaketa antolatuko du beste urte batez.
Abenduaren 24an izango da, Gabon gauean, 18:00etan hasita. Egun horretako 12:30ak baino lehen eman beharko dute izena parte hartu nahi dutenek, eta ondorengo baldintzak bete beharko dituzte: gutxienez, lau haurreko taldea osatzea; euskal jantziak soinean eramatea, eta jaiotza eramatea.
Bi kanta abestu beharko dituzte gainera. Horietako bat, nahitaez, Trakatran arre, arre! izan beharko dela zehaztu du antolakuntzak, eta bigarrena, taldeak hautaturiko beste bat. Abestien sariaz gain, jantziak eta jaiotza ere sarituko dituzte.
