2024. urte honetan egingo dituzten irteeren eta bidaien berri eman du Beheko Plaza erretiratuen eta pentsiodunen elkarteak. Hiru irteera prestatu ditu elkarteak, eta lehena otsailaren 16an egingo dute, El Burgo de Osma herrira, hain zuzen. Herri hau Soria probintzian kokatzen da, eta Soria hiriburutik 59 kilometrora dago.
Bidaia honetarako izen-ematea bihar bertan zabalduko dute, astelehenez, elkarteak Hogarren duen lokalean. Goizeko 11:00etatik eguerdiko 12:00etara bitartean jasoko dituzte interesdunen izenak.
Aurtengora begira antolatutako beste bi bidaiak maiatzean eta ekainean egingo dituzte. Maiatzean, hilaren 13tik 18ra bitartean, Azore uharteetara (Portugal) joango dira. Ekainaren 4tik 13ra, aldiz, Platja d'Aro (Girona, Herrialde Katalanak) herrian igaroko dituzte oporrak.
Bidaia horietarako informazioa jaso nahi dutenak elkartearen bulegotik pasatu daitezke.