Hurbiltzen ari dira San Telmo jaiak. Apirilaren 5etik 8ra eta 12tik 14ra ospatuko dira arrantzale kutsuko festak Zumaian. Beste eragile asko bezala, txosnak ere ari dira jaietarako egitaraua antolatzen. Horietako jendetsuenetakoa repetizioetan, apirilaren 12an, egingo den bertsio gaua izango da.
Talde ezagun edo ez hain ezagunen abestien bertsioak jo eta abestera igoko dira herritarrak Arranpla parean kokatuko duten txosnetako agertokira. Kontzertu berezi honetan parte hartu nahiko dutenek otsailaren 29a baino lehen eman beharko dute izena zumaikotxosnak@gmail.com helbidera idatzita.