Kirol denboraldiko proba esanguratsuenetakoa jokatu zen atzo goizez, Zegama-Aizkorri mendi maratoia, hain zuzen. 42 kilometro eta 195 metroko bidea egin behar izan zuten korrikalariek Aizkorri mendizerraren bi isurietan zehar. Desnibel metatua 5.472 metrokoa izan zuten.
Goizeko 9:00etan abiatu zen taldea Zegamatik, eta aurreikusita zegoen bezala, gizonetan irabazlea Kilian Jornet izan zen. Hamaikagarrenez irabazi du kataluniarrak lasterketa hau. Emakumeetan Sylvia Nodskar izan zen irabazlea.
Zumaiako korrikalariak ere izan ziren parte hartzaileen artean. Hala, gizonetan azkarrena Igon Manzisidor izan zen 4:39:06 denborarekin; 93. postuan heldu zen helmugara, eta hamahirugarren beteranoen mailan. Beteranoetan baita ere, Mikel Etxeberria 22. postuan sailkatu zen, 117. sailkapen orokorrean, 4:46:59 denborarekin. Seniorretan, berriz, Jokin Gijarro 127.a izan zen 4:50:10 denborarekin.
Emakumeetan, Garazi Artola izan zen Zumaiako bizilagunen artean lehena: 40.a izan zen sailkapenean, 5:40:38 denborarekin. Ainhoa Caporossi, berriz, 44. postuan heldu zen helmuga puntura, 5:54:50 denbora eginda.
Argazkiak: Maria Maya Manterola.