Euskal Herriko joaldunen topaleku izango da bihar Zumaia. Herriko joaldunek beste herri batzuetakoekin astinduko dituzte beren joareak Zumaiako kaleetan, eta egun osoko festarekin borobilduko dute topaketa.
Bazkari herrikoia antolatu dute egitarauaren barruan. Bazkari hau Sagarbideko frontoiko estalpera eramatea erabaki dute antolatzaileek. 350 lagun inguru elkartuko dira herri bazkarian larunbatean. Gaineratu dutenez, oraindik txartel batzuk geratzen dira. Txarteletako bat eskuratu nahi duenak telefono zenbaki honetara dei dezake: 688 60 52 33.
130 joaldun inguru espero dira bihar herrian. Goizeko 10:30ean janzten hasiko dira Aitzuri frontoiaren bueltan, eta handik abiatuko dute kalejira. Bazkaria, Andoni Ollokiegiren musikak lagunduko duena, 14:30ean izango da. Haren amaieran, 18:00etan, Zumaiako Hamarru elektrotxarangarekin batera ibiliko dira kalez kale.