Beste urte batez, Alai auzunean elkartu dira Zumaiako eta inguruko herrietatik gerturatutako dozenaka motozale. Izan ere, gaur da urtero egiten duten motozaleen topaketa, eta goizean goizetik hasita, jarduera ugari antolatu ditu Urola Kosta Bikes taldeak beren afizioarekin bat egiten duten guztientzat.
Aitzuri pilotalekuaren parean jarri dute biltzeko hitzordua, 09:30ean. Izena eman dutenei kamiseta bana eman diete antolatzaileek. 11:00etan, moto irteera egin dute, eta bi gurpilen gainean eskualdeko errepideetan barrena ibili dira; 12:00etan, Alai auzora itzuli dira. Bazkaria izan dute gero Santiago auzoko Talaia jatetxean.
Arratsaldean, Alai auzunean jarraituko du festak: zaldi simulazioa eta moto GP erakustaldia izango dituzte. Eguna amaitzeko, 20:00etan, zozketak egingo dituzte.