Pasa den astean jokatu da Hungariako Szeged hirian Europako piraguismo txapelketan, sprint modalitatean. Iñigo Peña palista zumaiarra bertan izan da, bi probatan parte hartzen: K2 500 metroan eta K4 1.000 metroan.
Bikoan, Carlos Garroterekin osatu du ontzia zumaiarrak. Finalerdietarako sailkatze estropadan aurrera egin zuen bikoak, baina finalaurrekoan kanporatuak izan ziren.
Lauko ontzia, berriz, Alex Graneri, Roi Rodriguez, Pedro Vazquez eta Iñigo Peñak osatu dute. Ostiraleko sailkatze estropadan bigarren izan ziren eta zuzenean lortu zuten finalerako txartela. Igande arratsaldean jokatu zuten finala, eta hirugarren postuan amaitu zuten, txapelketa irabazi zuten bieloerrusiarren eta bigarren egin zuten hungariarren atzetik. Ondorioz, brontzezko domina lortuta itzuli da Peña Hungariatik.
Nazioarteko hurrengo hitzordua abuztuan izango du, Uzbekistanen jokatuko den Munduko txapelketa, hain zuzen.