Irailetik abendura bitarteko egitarauaren berri eman du dagoeneko Irakurri matte irakurle taldeak. Tarte horretan lau aldiz bilduko dira, eta saio bakoitzean liburu bat izango dute hizketagai.
Lehen saioa irailaren 10ean izango da, eta Montserrat Roig idazlearen Gerezi-denbora eleberriaz arituko dira bertan bildutakoak. Iñigo Astizen Monogamoak aztertuko dute urriaren 8an, Joyce Carol Oatesen Bortxaketa. Amadiozko istorio bat azaroaren 12an, eta azkenik, Unai Elorriagak ondutako Francesco Pasqualeren bosgarren arima, abenduaren 10ean.
Saio guztiak Alondegiko Moila gelan izango dira, 18:00etan hasita, eta Uxue Alberdik gidatuko ditu.