Gaztela eta Leongo moto txapelketako hirugarren lasterketa jokatu dute pasa den asteburuan Valladolideko Tordesillas hirian. Erlojupekoan ez zuen egunik onena izan moto gidari zumaiarrak, eta laugarren postuan sailkatu zen. Lehen txandan, nahiz eta laugarren postuan abiatu, bigarren amaitzea lortu zuen egindako irteera onari esker.
Bigarren txandan ere laugarren postutik abiatu zen zumaiarra, eta lasterketako une batean hirugarren zihoan moto gidaria aurreratu bazuen ere, bigarren postuaren bila zihoanean zirkuitutik atera zen. Lasterketara azkar bueltatu zen, eta Tordesillaseko lasterketa hirugarren postuan amaitzea lortu zuen.