Musika Jaialdiaren bueltako hitzordu ugari izango da Zumaian asteburu honetan. Gaur, esaterako, Sapere Aude Sinfoniettaren kontzertua izango da, 20:00etan, Zumaiena aretoan. Giacomo Pucciniren eta Gustav Holsten obrak joko ditu Jon Malaxetxebarriak zuzenduko duen hamabost laguneko orkestrak. Emanaldi honetan ere urteurrenekin jokatu nahi izan dutela adierazi du taldekide Marixi Sesmak. "100 urte betetzen dira Puccini hil zela, 90 urte Holst hil zela, eta jaialdiak 40 urte beteko ditu". Kontzertu solidarioa izango da, eta behin gastuak estali ondoren aterako duten dirua minbiziaren aurkako elkartea laguntzeko erabiliko dute. Sarrerak dagoeneko salgai daude Turismo Bulegoan edo entradium.com webgunean.
Bihar eta etzi Zumaiako San Pedro parrokiko organoa ezagutzeko bi aukera izango dira. Batetik, bihar, larunbata, eguerdiko 12:00etan, hitzaldi musikatua eskainiko dute Iker Gonzalez eta Mari Karmen Azpeitia zumaiarrek. Igandean, hilaren 4an, 20:00etan hasita, Lucia Gomez mezzosopranoaren eta Gerardo Rifon organistaren emanaldia izango da parrokian bertan.