Finalera sailkatzeko partida jokatu dute gaur Espainiako selekzioak eta Alemaniak Parisko Olinpiar Jokoetan. Alemaniarrek partidaren hasieratik hartu dute aurrea, eta horiek hiru gol sartuta zihoazenerako iritsi da Espainiako selekzioaren lehena, Kauldi Odriozolaren eskutik. Jordi Ribera hasierako zazpikorako hautatu du zumaiarra, eta bi gol sartzea lortu du partida erabakigarrian.
Hamalaugarren minutuan etorri da lehen berdinketa, seina. Baloi batzuk lapurtu ditu Espainiak, baina berriz ere Alemaniak aurrea hartzea lortu du. Lehen zatian dinamika hori errepikatu da: alemaniarrak aurretik eta Espainiako selekzioa segika, alde txikiarekin. Azken segundoetan Alex Dujshebaev Espainiako jokalariak sartu duen golari esker berdinketarekin amaitu da lehen zatia, hamabina.
Bigarren zatiaren hasieran berdinketatik atera da Alemania, baina gertutik jarraitu du Espainiak. Dena den, azken hamar minututan erabaki da finala jokatuko duen selekzioaren izena. Une batean Espainiako selekzioa aurretik joan den arren, Alemaniak eskuratu du garaipena azkenean, 25 eta 24.
Finalerako txartela galduta, brontzeko domina irabazten saiatuko da Espainiako selekzioa. Igandean jokatuko du partida, goizeko 9:00etatik aurrera, bigarren finalerdiko galtzailearen aurka, Danimarka edo Eslovenia.