Uzbekistango Samarkanda hirian hasi berri dira piraguismoko Munduko Txapelketak, eta han da Iñigo Peña zumaiarra, iaz Duisburgen (Alemania) lortutako urrezko domina defendatzeko prest, Pedro Vazquez bikotearekin batera.
Oraingoz ondo ekin diote K2 1.000 metroko lehiari, sailkapen estropadan bigarren postua lortu eta zuzenean sailkatu baitira finalerako (3:19.042), finalaurrekorik jokatu beharrik izan gabe. Aurretik Joakim Lindberg eta Martin Nathell suediarrak sartu dira (3:18.216). Finala Euskal Herriko 11:20ean jokatuko dute, bihar, larunbata (Samarkadako 14:20ean).
Baina ez dira mila metroko probarekin amaituko Iñigo Peñaren lanak, K4 mistoan ere parte hartuko baitu zumaiarrak, 500 metroko estropadan. Sailkatze estropada larunbatean bertan jokatuko dute, 07:30ean, K2ko finala baino lau ordu lehenago.