Zortzi film emango dituzte irailean zehar Zumaiako zinema aretoan. Helduentzako eta haurrentzako launa film ikusteko aukera izango da datozen lau asteburuetan.
Bihartik aurrera, eta astelehenera arte, El mayordomo ingles film frantziarra emango dute. John Malkovich eta Fanny Ardant aktore lanetan dituen komedia 19:30etik aurrera ikusi ahal izango da. Andrew Blake negozio-gizon britainiarrak, bere lekua aurkitzen ez duen mundu batez nekatuta dagoenak, Frantziako etxe bateko etxezain lana onartzen du bere emazte frantziar zenaren oroitzapenak gordetzeko. Beauvillier lursailera heltzerakoan, non inork ez baitaki benetan nor den, atsedena bilatzen saiatzen da bere pentsamenduak ordenatzeko. Hala ere, kontrolik gabeko topaketek eta egoerek oso bestelako norabide batean eramango dute.
Igandean, berriz, irailaren 8an, 17:00etan, Buffalo kids animazioko pelikula eskainiko dute. Saioa euskaraz izango da.
Honakoak izango dira Zumaiako zinema aretoan emango diren beste filmak
- Irailak 13, 14, 15 eta 16: Volvereis.
- Irailak 15: Gru 4. Mi villano favorito.
- Irailak 20, 21, 22 eta 23: Romper el circulo.
- Irailak 22: 10 vidas.
- Irailak 27, 28, 29 eta 30: Bitelchus Bitelchus.
- Irailak 29: Koati.