Bermeon (Bizkaia) jokatu du Zumaiak Euskotren ligara igotzeko play-offeko lehen estropada, erlojuaren aurka, eta igoerako bi txarteletako bat gertuago dute orain zumaiarrek: izan ere, estropada bikaina egin dute Telmo Deuneko emakumeek. Norgehiagoka osoan aurretik ibili dira. Azkenean, baina, hamabi ehunenekogatik, Astillerorentzat izan da garaipena –bueltako luzean denbora oso ona egin du–, baita lau puntu garrantzitsuak ere.
Beste bi lehiakideak, Chapela eta Cabo, oso atzean gelditu dira, sailkapeneko denboretan ikus daitekeenez, eta beraz, zumaiarrak gaurkoa errepikatzera aterako dira bihar eguerdian Portugaleteko itsasadarrean (11:20ean).
Honakoa da gaurko sailkapena:
1. Astillero: 12:16,52.
2. Zumaia: 12:16,64.
3. Chapela: 12:30.
4. Cabo: 12:41.
