Iragarpenen arabera, bihar izango du mailarik altuena itsasgorak: 18:30ak aldera, 5 metro inguruko altuera hartuko du. Gaur ez da maila horretara heldu, baina, hala ere, 17:30ak aldera izan den itsasgorak irudi ederrak ateratzeko aukera ekarri du. Zorionez, ez du kalterik eragin. Euririk ez du egin eta itsasoa ere bare egon da gaurkoan. Hala, ez da olaturik sartu portuko bokatik.
Herriko leku batzuetan, Trenbide etorbidean, Zubiberri parean, esaterako, itsasoa ubidetik atera da baina kalterik eragin gabe. Axular ibiltokian ere, Zumaiena ikastetxetik gertu, ibaibidetik ateratzeko zorian izan da ura, baina, gaurkoz, behintzat, bere lekuan jarraitu du.
Herritar batzuk, bai, izan dute Urolaren itsasadarreko eskoilera gainetik ibiltzeko tentazioa. Heldu zein haur gerturatu da Sarauneko zabalgunera, eta handik abiatu dira gaur urak estalitako pasabidera.