Jada ez da antolatzen Klarinete Maratoirik Zumaian, baina bai instrumentu horri loturiko hainbat jarduera. Horien artean da udazkenean egin ohi den klarinete laukoteen kontzertu lehiaketa. Udalak jakinarazi du aurtengo finala azaroaren 9an izango dela, eta aurrez, urriaren 14tik 28ra artean eman beharko dela izena.
Parte hartzeko, izena ematearekin batera, klarinetearekin beren abilezia erakutsi beharko dute musikariek. Grabazio bat –gehienez bost minutuko audioa edo bideoa– bidali beharko dute info@sasmusikaelkartea.com helbidera, laukoteko kideen izen-abizen eta kontakturako datuekin batera.
21 urte arteko klarinete jotzaileei zuzenduriko lehiaketa da, eta hiru kategoriatan jokatuko da: 8 eta 12 urte bitartekoak, 13 eta 16 urte bitartekoak eta 17tik 21era bitartekoak.
Oinarriak
Jakinarazi dituzte lehiaketako oinarriak jada. Lehiaketa honetan parte hartu ahal izango dute musika-ikasketak edozein Musika Kontserbatoriotan edo Musika Eskolatan egiten ari diren ikasleek, 21 urtetik behera badituzte.
Bestalde, laukotearen kide bat edo bi dagokien kategoria baino txikiagokoak izatea baimentzen da, baina ez handiagokoak, eta laukote irabazleak ezin izango du hurrengo ediziora kategoria berean aurkeztu, taldekideren bat aldatzen ez bada, behintzat.
Urval Ensemble, ZUMB, Nazioarteko Musika Jaialdia eta irakasle adituak izango dira epaimahaiko kideak, eta, besteak beste, kontuan hartuko dituzte aurkeztutako lanen originaltasuna, klarinete ezberdinen erabilera eta agertokian erakutsitako jarrera.
Sariak
Sari ekonomikoa jasoko du laukote irabazleak, diplomarekin batera. 17-21 urtekoetan, gainera, laukote irabazleak Pariseko Buffet Crampon lantegia bisitatzeko aukera izango du, baita 2025eko udan Zumaiako Nazioarteko Musika Jaialdiaren baitan kontzertu ordaindua eskaintzeko aukera ere.
Epaimahaiaren erabakia eta sari banaketa, lehiaketa amaitzean egingo da, Sapere Aude Sinfoniettaren lagunak taldeak Max Bruchen 8 Stücke Op.83 obraren pieza batzuk interpretatu ondoren klarinete, txeloa eta pianoaren bertsioan.